Viti 2014 – Vit i kthesës për UP-në

Këshilli Drejtues i Universitetit të Prishtinës, si organi më i lartë i këtij institucioni, në kuadër të kompetencave dhe të përgjegjësive të veta, gjatë vitit të shkuar ka zhvilluar një sërë aktivitetesh për avancimin e punës mësimore dhe shkencore në UP.

“Për herë të parë në historinë e këtij Universiteti, KD-ja e ka hartuar Planin Strategjik trevjeçar me të gjitha specifikat dhe detyrat konkrete të zbatimit të tij. Ky plan është mbështetur në Planin Strategjik për Zhvillimin e Arsimit 2011-2016 dhe në Programin Kombëtar të Shkencës 2010-2015, por që, për habinë e të gjithëve, ky dokument akoma nuk është publikuar në faqen e Universitetit”, thotë komunikata.

Këshilli Drejtues e ka krijuar infrastrukturën e domosdoshme, si dhe ka hartuar një varg rregulloresh të rëndësishme, duke përfshirë edhe Rregulloren për kodin e etikës, Rregulloren për themelimin e instituteve në kuadër të njësive akademike, që në një fazë të parë ka rezultuar me krijimin e instituteve në Departamentin e Biologjisë dhe të Matematikës, si dhe Rregulloren për krijimin e teatrit në kuadër të Fakultetit të Arteve, por dhe akte të tjera të domosdoshme për punën në UP.

Në kuadër të angazhimeve për sigurimin e infrastrukturës dhe të kushteve të punës në UP, Këshilli Drejtues, në bashkëpunim edhe me menaxhmentin, i ka nisur procedurat për ndërtimin e objektit të ri të FSHMN-së, gjë që pritet të realizohet vitin që vjen, si dhe ka vazhduar me zbatimin e projekteve ekzistuese, përfundimin e aneksit në Fakultetin Ekonomik, rregullimin e kampusit të Universitetit, si dhe punë të tjera infrastrukturore në disa njësi akademike.

Lidhur me zhvillimet e fundit, që u karakterizuan edhe me zbardhjen e disa shkeljeve të rënda në Universitet, kryesisht gjatë 3-4 vjetëve të fundit, Këshilli Drejtues e ka shprehur shqetësimin e vet serioz, duke qenë edhe vetë iniciator i masave konkrete ndaj shkelësve të ligjit. Këshilli Drejtues i UP-së, gjatë gjithë këtij viti, e ka inkurajuar në vazhdimësi menaxhmentin dhe rektorin, që, në kuadër të kompetencave që kanë, të bëjnë gjithë ç‘është e mundur, me qëllim të kthimit të imazhit pozitiv, por edhe të normalitetit në këtë institucion të shkencës dhe të dijes në Republikën e Kosovës.