Visar Zhiti: Pse e pranova kulturën. Deputet? S’bëhen 2 punë njëherësh

Tiranë – Ministri i ri i Kulturës, poeti i njohur Visar Zhiti nuk ka hezituar ta pranojë postin e besuar nga kryeministri Sali Berisha, në një situatë të tillë kur LSI-ja u tërhoq nga qeveria.

Z.Zhiti, tregon për “Gazeta Shqiptare” si e mori propozimin dhe arsyet pse e pranoi atë, ndërsa bën të ditur se ende nuk ka vendosur se çfarë do të bëjë nëse i propozohet që të përfshihet në listën e kandidatëve për deputetë në zgjedhjet e 23 qershorit.

Z.Zhiti, si erdhi propozimi juaj për ministër Kulture?

Më është propozuar sot që ta pranoj si post dhe gjykova se nuk duhet refuzuar.

Kush jua propozoi?

Propozimi m’u bë nga Kryeministria.

Cilat janë arsyet që e pranuat postin e ministrit të Kulturës?

Kultura jonë meriton punë, meriton përkushtimin e të gjithë atyre që prodhojnë kulturën, e cila është një pasuri e përbashkët. Na takon ta administrojmë së bashku. Gjykoj se kjo thirrje, ky vokacion, bën që të mos i shmangemi një apeli të tillë.

Si i konsideroni emrat e tjerë të ministrave?

Emra të gjetur, janë emra të spikatur si ministra. Dëshiroj që edhe ata ta konsiderojnë këtë apel dhe të mos e shmangin atë.

Kjo do të thotë se do të përfshiheni edhe në listën e kandidatëve për deputetë në zgjedhjet e 23 qershorit?

Kjo është tjetër gjë. Ndoshta nuk bëhen dy punë njëherësh. Nuk e di se çfarë t’ju them për këtë. Nuk kam kërkuar hollësi, por gjykova se ky është një apel në një rast të veçantë dhe nuk ke pse refuzon. Ndaj dhe unë e pranova detyrën e ministrit të Kulturës. (BW)