Vetëvendosje e pret Ban Ki moonin me grafitin UN FAIR!

Prishtinë– (E plotësuar) Ndërkohë Lëvizja Vetëvendosje përmes një komunikate për medie ka konfirmuar se aktivistët të saj sot “rreth orës 11:00 shkruan parullën UNFAIR në hyrje të ndërtesës së UNMIK-ut në zonën industriale, në magjistralen Prishtinë – Fushë-Kosovë”.

Njoftimi vazhdon se “me të filluar shkrimin e parullës, pa kurrfarë paralajmërimi dhe me gjithë faktin që dukej qartë që aktivistët thjeshtë do të shkruajnë një parullë, policët e Kosovës intervenuan në mënyrë të shfrenuar ndaj aktivistëve.

Ata hodhën spray lotsjellës në mënyrë të pakontrolluar, goditën aktivistët me grushta dhe ofendonin pandërprerë. Edhe pasi aktivistët e shkruan parullën, policia insistonte në të njëjtën mënyrë të shfrenuar t’i arrestonte ata. Gjatë këtij intervenimi, shumica e aktivistëve të Vetëvendosjes u lënduan nga sprey lotsjellës, ndërsa aktivisten Krenare Krasniqi e përplasën për tokë duke ia lënduar kokën”, përfundon njoftimi, i shoqëruar edhe me foto.

Prishtinë, 24 korrik – 12:06 – Në selinë e UNMIKU-t, aktivistë të Lëvizjes Vetëvendosje kanë shkruar parullën UN FAIR!

Gjatë këtij aksioni ka intervenuar policia e Kosovës, e cila, siç thuhet, ka përdorur sprej ndaj aktivistë.

Erzen Vraniqi, sekretar organizativ në Lëvizjen Vetëvendosje, ka thënë se policia e Kosovës ka përdorur dhunë të tepruar ndaj aktivistëve. Sipas tij, nuk ka të arrestuar.(kohanet)