Vetëm suksesi në finale realizon ëndrrën e italianëve

Krakow – Ideja se Përfaqësuesja e Italisë do të arrinte në finalen e “Euro 2012” do të përqeshej nëpër piceritë e Romës dhe Milanos para një muaji. Mirëpo, tash gjërat kanë ndryshuar.

Ekipi i Cesare Prandelli ka tejkaluar të gjitha parashikimit.

Fitorja 2:1 në gjysmëfinalen e “Euro 2012” ndaj Gjermanisë nuk shokoi vetëm Joachim Loewin, por edhe popullin në mbarë Italinë, sepse askush nuk ka pritur që ekipi italian të luajë të dielën në finalen e Evropianit në Kiev.

Humbja 3:0 në miqësoren e fundit para Evropianit nga Rusia dhe skandali i kurdisjes së rezultateve ku u përfshi edhe futbollisti Domenico Criscito, nuk ishin përgatitjet më të mira për Italinë. Të gjitha këto kanë bërë që italianët të heqin dorë nga ideja se Italia mund ta sfidojë titullin e kampionit të Evropës.

Megjithatë, Italia shpesh ka lulëzuar në momente të mjerueshme. Në vitin 1982 dhe 2006 ka fituar titullin e botës kur është pritur më së paku. Në Botërorin 2006 Italia në gjysmëfinale pati mposhtur Gjermaninë, në momentin kur Serie A ishte e përfshirë në skandalet e kurdisjeve. (koha)

Shpërndaje.
© RAJONIPRESS