Veseli: BE të bëjë presion ndaj Beogradit për të zbardhur fatin e të pagjeturve të Kosovës

Kryetari i PDK-së, Kadri Veseli, në Ditën Ndërkombëtare të Zhdukurve, ka thënë se shpreh solidaritet ndaj familjarëve të të pagjeturve, të cilët, për më shumë se dy dekada jetojnë në makth duke kërkuar që të mësojnë çka ndodhur me të afërmit e tyre.

Veseli ka thënë se edhe 20-vjet pas luftës, plaga e të pagjeturve rëndon shoqërinë.

“Sot shënohet Dita Ndërkombëtare e të Zhdukurve. Edhe pse kanë kaluar 20 vjet nga lufta kjo plagë e hapur ende e rëndon shoqërinë tonë duke shkaktuar dhimbje të pandalshme tek familjet e pothuaj 1700 qytetarëve.

Shpreh solidaritetin ndaj familjarëve të të pagjeturve, të cilët, për më shumë se dy dekada jetojnë në makth duke kërkuar që të mësojnë çka ndodhur me të afërmit e tyre”, ka shkruar Veseli në Facebook, transmeton Telegrafi.

Veseli ka bërë thirrje tek mekanizmat ndërkombëtarë dhe Bashkimi Evropian, që të bëjnë presion ndaj Beogradit për të zbardhur fatin e të pagjeturve të Kosovës dhe për të vendosur para ligjit kriminelët përgjegjës./Telegrafi/