Vendnumërimi i shtetit

Raporti i Progresit i Komisionit Evropian për Kosovën, edhe këtë radhë pritet të ketë anën pozitive, sfidat por edhe ngecjet në përmbushjen e standardeve evropiane dhe lansimit të reformave ligjore e administrative.

Me përjashtim të proceseve të suksesshme zgjedhore komunale e qendrore, në fushat tjera Kosova, kryesisht ka ngecur në stadin e vitit 2013.

Komisioni Evropian pritet që nga mesi i muajit të publikojë raportet për vendet e Ballkanit Perëndimor ku kritika e përbashkët, sipas njoftimeve që tashmë vijnë nga përfaqësitë evropiane në Prishtinë, do të jenë për mungesën e luftimit të krimit të organizuar dhe korrupsionit, gjyqësori i ndikuar dhe varur dhe politik, si dhe administratat ende të pareformuara të shtetit. Sa i përket Kosovës, këto burime kanë bërë me dije se do të ketë disa lavdata në lidhje me zgjedhjet e 8 qershorit.

Procesi i zgjedhjeve të 8 qershorit, paralajmërohet se do të vlerësohet si demokratik, sipas standardeve evropiane. Por, marrë parasysh që raporti i progresit është dinamik dhe përfshinë etapën tjetër, atë të konstituimit të institucioneve, do të ketë edhe vlerësime shqetësuese për zvarritjet në formimin e institucioneve. /Tribuna