Vendime me peshë për Kamenicën: Komiteti për Politikë dhe Financa miraton unanimisht të gjitha pikat

Kamenicë – Është mbajtur sot mbledhja e tretë e rregullt e Komitetit për Politikë dhe Financa në kuadër të kësaj legjislature të Kuvendit Komunal të Kamenicës, ku janë shqyrtuar dhe miratuar një sërë çështjesh me rëndësi për funksionimin institucional dhe zhvillimin e komunës.

Mbledhjen e ka hapur kryesuesja e Kuvendit Komunal, Arbnore Beqiraj-Fera, e cila para anëtarëve ka paraqitur rendin e ditës me disa pika kyçe për shqyrtim. Fillimisht është miratuar procesverbali nga mbledhja e dytë, ndërsa më pas është diskutuar raporti financiar buxhetor i Komunës së Kamenicës për periudhën 1 janar – 31 dhjetor 2025.

Në vijim, anëtarët e komitetit kanë shqyrtuar dhe miratuar propozim-vendimin për formimin e komisionit që do të merret me inicimin dhe zhvillimin e procedurave për ndryshimin e stemës së Komunës së Kamenicës, si dhe propozim-vendimin për themelimin e Këshillit Komunal për Siguri në Bashkësi (KKSB).

Po ashtu, në këtë mbledhje janë trajtuar edhe propozim-vendimet për shpalljen në interes të përgjithshëm publik, si dhe çështje të tjera të ndryshme me interes për komunën. Para miratimit të rendit të ditës, kryesuesja ka propozuar edhe dy pika shtesë, të cilat kanë të bëjnë me miratimin e raporteve të Komisionit Komunal për vlerësimin e dëmeve nga fatkeqësitë natyrore dhe shpalljen në interes të përgjithshëm publik.

Të gjitha pikat e rendit të ditës, përfshirë edhe ato të shtuara, janë miratuar unanimisht nga anëtarët e Komitetit për Politikë dhe Financa, duke reflektuar një konsensus të gjerë për çështjet e trajtuara në këtë mbledhje./rajonipress/