Vdes Bardh Hamzaj

Publicisti dhe gazetari Bardh Hamzaj ka vdekur sot në Durrës, ka njoftuar Klan Kosova.

I njohur për kolumnet, edhe në gazetën Express, Bardhi ka ndërruar jetë në Durrës në orët e pasdites të ditës së sotme.

Së fundi ai punonte në Gjykatën Kushtetuese.

Bardh Hamzaj ishte për një kohë të gjatë kryeredaktor i së përditshmes “Zëri”, gazetar, publicist dhe shkrimtar i respektuar në të gjitha trojet shqiptare.

Ai po ashtu ka shkruar edhe disa libra siç ishte ajo “Rrëfime për luftën dhe lirinë”, “Haradinaj dhe Haga”, por edhe libra të tjerë publicistik.

Ndërkaq, Gjykata Kushtetuese e Republikës së Kosovës e ka njoftuar opinionin e gjerë se “sot ndërroi jetë njëri ndër punonjësit e saj më të devotshëm, kolegu ynë dhe redaktori, Bardh Hamzaj”.

Gjykata Kushtetuese e Republikës së Kosovës dhe kryetari i saj, Prof. dr. Enver Hasani, i shprehin ngushëllimet më të sinqerta familjes Hamzaj për këtë humbje dhe të gjithë atyre që patën rastin dhe fatin e mirë të jenë bashkëpunëtorë të tij.