Vdekja tragjike e një 20-vjeçareje shqiptare në Itali, pas një rënieje nga ballkoni

Anxhela B., një 20-vjeçare me origjinë shqiptare, humbi jetën mbrëmjen e së enjtes në Piacenza, pas një rënieje nga ballkoni i banesës ku jetonte me bashkëshortin e saj, gjithashtu shqiptar.

Shërbimet e emergjencës, përfshirë ambulancën 118 dhe karabinierët, u njoftuan nga bashkëshorti i saj, i cili e gjeti Anxhelën të shtrirë në oborrin e brendshëm të pallatit në Viale Beverora. Rënia nga një lartësi rreth 10 metrash i shkaktoi dëmtime të rënda, veçanërisht në kokë, që rezultuan fatale.

Hetuesit e karabinierëve kanë kryer një rindërtim të ngjarjes dhe inspektime të hollësishme në apartament dhe zonat përreth. Sipas tyre, nuk ka tregues që të jenë përfshirë palë të treta, dhe besohet se rënia ishte një aksident.

Hetimet tregojnë se Anxhela kishte mbetur jashtë apartamentit dhe, gjatë përpjekjes për t’u kthyer brenda përmes ballkonit, humbi ekuilibrin dhe ra.

Familjarët e saj, përfshirë nënën dhe motrën, kanë mbërritur nga Shqipëria për t’u qëndruar pranë të afërmve në këto momente të vështira.