Vazhdon fiskalizimi i tregtarëve të karburanteve

​Administrata Tatimore e Kosovës (ATK) ka njoftuar të gjitha bizneset që merren me tregtimin e karburanteve që nga muaji shtator i këtij viti, në bashkëpunim me operatorët e licencuar për Pajisje Elektronike Fiskale (PEF) do të vazhdojë me shtrirjen e procesit të fiskalizimit. ATK është e përkushtuar në realizimin e detyrave dhe obligimeve që dalin nga legjislacioni tatimor dhe plani strategjik i ATK-së.

“Kontribut të veçantë në ngritjen e mirëqenies për të gjithë qytetarët e Kosovës kanë të gjithë tatimpaguesit që i kryejnë obligimet e tyre tatimore, në pajtueshmëri të plotë me kërkesat e legjislacionit tatimor të aplikueshëm në Kosovë.

Me qëllim të rritjes së përmbushjes vullnetare të obligimeve nga tatimpaguesit, ofrimit të shërbimeve profesionale, transparente dhe efektive dhe posaçërisht zbatimit të drejtë dhe të njëtrajtshëm të legjislacionit tatimor për të gjithë tatimpaguesit, ATK kërkon nga bizneset që deri tani kanë dështuar të fiskalizohen, ta përmbushin këtë detyrim (përfundojnë procedurat e fiskalizimit), në afatin sa më të shkurtër kohor.

ATK mbetet e përkushtuar në realizimin e detyrave dhe obligimeve që dalin nga legjislacioni tatimor, andaj, të gjithë tatimpaguesit që nuk i përgjigjen kërkesës ligjore për t’u pajisur me pajisje elektronike fiskale, do të jenë objekt i përndjekjes për shkelje penale sipas Kodit Penal të Republikës së Kosovës”, thuhet në njoftimin e ATK-së.