Varrezat shqiptare i shkruajnë Bashkësisë Islame të Gjilanit

Nga Demir Krasniqi – E nderuara Hirësi !. Ne, të amshuarit që banojmë në Kompleksin e Përjetësisë të Varrezave të Gjilanit, e që i takojmë kombit shqiptarë me besimin islam , së bashku me vëllezërit dhe motrat tjera të po këtij besimi , vendosëm që t’iu drejtohemi Juve, hirësi, dhe t’iu tregojmë për hallet tona këtu në botën e amshuar !

Ju, Hirësi e nderuar, e dini mirë se si kemi jetuar në atë “Dynja të rrejshme”, gjithmonë së bashku nën ombrellën e “Vëllazërim – Bashkimit”, me popujt sllavë dhe me të gjithë të tjerët që ishin të gjallë !

Nuk kemi mundur as dasmat , as festat e as vdekjet t’i kryejmë pa prezencën e atij “Vëllazërim –Bashkimi”!

Duke iu falënderuar Zotit të madhërishëm , shokut Tito dhe disa komunistëve të përbetuar , të cilët e jetësonin kudo rrugën e Partisë së Tij, Komuniste , ne edhe në banesat e amshimit , u gjendëm së bashku në një oborr me ata të besimit sllavo – ortodoks , me shërbëtorët e sllavo-komunizmit dhe me besimtarët e konfesionit islam !

Pra, të madhërishmit dhe të lavdishmit , me përpjekjet e tyre vetëmohuese , na e bënë të mundshme që të varrosemi në një oborr, të jetojmë në një fqinjësi të mirë dhe ta trashim edhe në botën e amshuar , të gjithë së bashku “Vëllazërim – Bashkimin”!

Sa herë që varrosej ndonjë pjesëtarë i besimit sllavo – ortodoks , ne na hynte tymi i popave nëpër birucat e varrezave tona dhe na tymosnin për së vdekuri !

Por, ne me modesti dhe respekt , i dëgjonim lutjet e tyre fetare , këndimet, kryqëzimet dhe vajtimet që bëheshin mbi varrezat e “vëllazërillëkut “ tonë !

Edhe fqinjët tanë të besimit sllavo – ortodoks , “kënaqeshin” me tallkinet që na i këndonin për çdo ditë hoxhallarët dhe myezinët tanë !
Bile, shumë herë edhe ata habiteshin dhe në vend se të kryqëzoheshin , thërrisnin me zë të lartë : Allahu Ekber!”

Projektuesit dhe pushtetarët sllavo – komunistë , me sahanlëpirësit e tyre besnikë , patën para sysh edhe sigurinë tonë në botën e amshuar !

Patën para sysh edhe klithjet e herë pas hershme :”Kosova – Republikë!” Patën para sysh protestat , demonstratat , irredentizmin dhe separatizmin e mundshëm edhe në botën e amshuar !

Dhe, mu për këtë , projektuan thurjen e Kompleksit të Varrezave të qytetit të Gjilanit , me pllaka të larta betoni , me arkitekturë serbo-çetnike , mbi të cilat fshihet arti i shajkaçave serbe, sytë e mprehtë të xhelatxhinjëve serbë dhe trupat e mbuluar me shinjellat e tyre tradicionale !

Kjo arkitekturë e përdorur në rrethojat e varrezave shqiptare me përkatësi fetare myslimane , na bënë të jemi krenarë dhe të sigurt , sepse shajkaçat serbe qëndrojnë të patrembura lartë përmbi kokat tona, duke na bërë roje ditë e natë , që të mos dalim më kurrë nga banesat e amshimit, për të protestuar nëpër rrugët e qytetit tonë dhe për të mos kërkuar Pavarësi e Republikë !

Bedenat e forcuar prej betonit , armaturave të çelikta , shajkaçave serbe dhe syve të mprehtë të këtyre rojeve , bëjnë që edhe në botën e amshuar , të mos luhatet për asnjë moment rruga e “Vëllazërim – Bashkimit”, komshillëku , kumbaria , pobratimllëku , miqësia dhe ngritja e dollive të përbashkëta për çdo festë , dasmë dhe aheng që na pret !

E nderuara Hirësi !

Në kohën kur po mbushet oborri i përjetësisë së përbashkët multietnike , me ndërtime leje e pa leje , druajmë se një ditë nuk do të gjendet më vend për asnjë banesë të re !
Tani , shtrohet pyetja , se ku do të gjendet trualli i sigurt , për ndërtimin e Kompleksit të Banesave të Amshimit, kur nuk do të gjenden më arkitektë , që do të projektojnë thurjen e sigurt të këtij Kompleksi ?!

Ne, jetojmë me shpresë , se Hirësia e Juaj demokratike , do të kujdeset më shumë për ndarjen e trojeve të Amshimit , pa korrupsion dhe do të kujdeset për projektin e rrethojave të sigurta nën arkitekturën , të cilën e meritojnë pasardhësit tanë në Botën e Amshuar !

Të fala shumë , nga Stafi Drejtues i Varrezave Myslimane të Gjilanit !

Gjilan, më 07.09.2013.