Valentina Smajli nuk rizgjidhet më në kryesinë e SP-PS

Pasi që pak ditë më parë, Partia Socialdemokrate e qytetit të Lucernit nuk e kishte kandiduar për rizgjedhje në komisionin për natyralizim, politikania shqiptare-zvicerane Valentina Smajli nuk gjeti vend as në kryesinë e kësaj partie, në nivelin qendror, ku ajo bënte pjesë katër vitet e fundit.

Në kuvendin e mbajtur më 8 dhe 9 shtator në Lugano, kjo parti nuk e ka rizgjedhur Valentinën në postin që kishte. Shkak për këtë ishte se ajo nuk ka gëzuar mbështetje nga dega kantonale e partisë së saj.

Por arsyet për këtë mos mbështetje duket se qëndrojnë më thellë, pikërisht në konfliktin që ajo ka pasur me kolegun e saj nga partia, Simon Roth, të cilin ajo e kishte denoncuar për zbulimin e të dhënave interne nga komisioni për natyralizim. Ky denoncim i ka prishur punë Smajlit edhe në rastin e zgjedhjeve për kryesinë e SP-së, të dielën.

Deputetja nga radhët e SP-PS në Parlamentin e Zvicrës Jacqueline Fehr ka thënë se moszgjedhja e Valentinës është me siguri një hendikep, por që megjithatë nuk duhet dramatizuar.

“Kjo doli si rezultat i një ballafaqimi demokratik të kandidatëve shumë të fortë. Janë zgjedhur ata të cilët kanë qenë më bindës me paraqitjen e pikëpamjeve të tyre politike”, ka thënë Fehr.

Ndërsa kryetari i JUSO-s, Philip Roth, që është edhe vëllai i Simon Roth nga Lucerni, ka thënë se nuk ka arsye politike për moszgjedhjen e Valentinës por shkas mund të jetë “paraqitja e saj e papërshtatshme në medie duke vënë në pozitë të vështirë partinë e saj”.

Megjithatë, Valentina Smajli nuk do të braktisë partinë e saj. Siç ka thënë në gazetën “Luzerner Zeitung”: “Nuk është partia por persona të caktuar të cilët ushtrojnë forcën e tyre në parti, ata që janë pozicionuar kundër meje”.