Urgjentisht të formohet komision miks për Demarkacionin

Diplomati shqiptar Lisen Bashkurti ka thënë se, pas rekomandimit të Komisionit Evropian për liberalizimin e vizave për qytetarët e Kosovës, tash urgjentisht mbetet definimi i demarkacionit kufitar Kosovë – Mali i Zi.

“Referuar në gjashtë instrumentet ndërkombëtare kryesore për zgjidhjen paqësore të problemeve midis shteteve, për rastin e demarkacionit kufitar Kosovë – Mali i Zi më i përshtatshmi, më funksionali dhe më i shpejti është institucioni i ‘komisioneve mikse’, ka shkruar Bashkurti në profilin e vet në “Facebook”.

Postimi i plotë i Lisen Bashkurtit:

Kosova mori mbështetjen e Komisionit të BE-së për liberalizimin e vizave në hapësirën Shengen. Ne përputhje me procedurat vendimmarrëse të BE-së bazuar në Traktatin e Lisbonës dhe në Marrëveshjen Shengen, pas rekomandimit te Komisionit nevojitet votimi i dy institucioneve të tjera të BE-së, Këshillit Evropian dhe Parlamentit të BE-së që rekomandimi i Komisionit të hyjë në fuqi.

Në këtë faze të ndërmjetme Komisioni ka të drejtë të bëjë rekomandime të mëtejshme për t’u konsideruar nga Kosova. Ndër rekomandimet e bëra janë dy: definimi i demarkacionit të kufirit territorial midis Kosovës dhe Malit të Zi, si dhe hedhja e hapave konkretë kundër korrupsionit dhe krimit te organizuar. Për kohën e mbetur deri në qershor urgjentisht mbetet definimi i demarkacionit kufitar Kosovë – Mali i Zi. Referuar në gjashtë instrumentet ndërkombëtare kryesore për zgjidhjen paqësore të problemeve midis shteteve, për rastin e demarkacionit kufitar Kosovë – Mali i Zi më i përshtatshmi, më funksionali dhe më i shpejti është institucioni i “komisioneve mikse”. Këto mund të jenë midis palëve dhe një pale të tretë ose krejtësisht neutrale ndaj palëve.

Meqenëse në rastin në fjalë të dyja palët, Kosova dhe Mali i Zi, kanë shprehur vullnetin e mirë për rishikim të demarkacionit, ngritja e komisionit miks dypalësh është institucioni më i arsyeshëm, më i dobishëm dhe më i drejtë. Është momenti kohor më kritik që të hidhet hapi për këtë çështje me interes të ndërsjellë për të dyja palët. Në diplomaci koha është elementi më i rëndësishëm që lypet të konsiderohet. Qysh në lashtësi është thënë “me jepni kohë që të fitojmë gjithçka”. A po e shfrytëzojmë kohën në rastin e definimit të demarkacionit kufitar Kosovë – Mali i Zi!?/epoka e re/