Ura e përgjakur!

Duhet të jesh me fat nëse ia arrin të dalësh gjallë ditën e nesërme, pasi ke kaluar një ditë apo natë në bodrume e baraka, ku jetojnë familjet shqiptare të dëbuar nga veriu i Mitrovicës.

Lagështira dhe myku mundin ajrin, frymëmarrja nis e të vështirësohet në dhomat ku jetojnë këto familje, ndërsa në korridoret ku banjat e përbashkëta kundërmojnë më shumë nga gypat e vjetruar e as drita nuk depërton, këmbën duhet ta ruash se mos të qëllon në ndonjë gropë sikurse në korridorin e katit të dytë apo dhe atë të tretë që kanë nisur të shemben e të cilat këta banorë i kanë mësuar përmendësh ku janë dhe tash tregojnë kujdes.

Matanë lumit të Ibrit u kanë mbetur pronat dhe shtëpitë. Mijëra familje shqiptare me fëmijë të vegjël, me pleq, nëna kryefamiljare e pa mbështetje po jetojnë të strehuara nëpër podrume, baraka e ndërtesa të vjetra që kanë nisur të shemben.

Me shpresën se një ditë do të kthehen në shtëpitë e tyre, ata po jetojnë të shpërndarë nëpër Kosovë që nga përfundimi i luftës në vitin 1999./zeri/