Universiteti i Prishtinës, në tetor me rektor të ri

Ministria e Arsimit, Shkencës dhe Teknologjisë, me një urdhëresë administrative u ka hapur rrugë zgjedhjeve, të cilat në tetor sjellin rektorin e ri të Universitetit të Prishtinës, duke prishur kështu vendimin e Këshillit Drejtues për shtyrjen e zgjedhjeve të përgjithshme dhe atyre studentore në Universitetin e Prishtinës.

Lajmin e ka konfirmuar këshilltari i ministrit Ramë Buja, Ragip Gjoshi , i cili ka thënë se ministria e arsimit ka nënshkruar udhëzimin administrative që hap shtigje dhe rrugë për të pasur zgjedhje të mirëfillta dhe të drejta.

“Zgjedhjet studentore mund të mbahen. Ka afat optimal dhe të mjaftueshëm gjatë kohës kur studentët janë në procesin mësimor gjatë vitit akademik.

Do të thotë ato mund të përfundojnë para majit. Sidoqoftë, për afatet dhe të tjerat edhe pse ne me sa jemi të njoftuar organet e universitetit kanë shpallur zgjedhjet studentore, por me udhëzimin administrative garantohet që 1 tetori të jetë dita e fundit ku në rektorat do të jetë rektori i ri dhe gjitha organet e reja universitare”, ka thënë Gjoshi për Kosovapress.

Ai sqaron se pse nuk kanë përfillë vendimin e Këshillit Drejtues të UP-së për shtyrjen e zgjedhjeve për shkak të ndryshimit të statutit të UP-së, duke thënë se kanë marr këtë vendim pasi që statusi i Universitetit të Prishtinës kërkon një procedurë të miratimit duke përfshirë edhe ratifikimin në Kuvendin e Kosovës, i cili edhe mund të vonohet.

Ndryshe, protesta e paralajmëruar e studentëve për ditën e mërkurë, për shkak të shtyrjes së zgjedhjeve nuk do të mbahet, pasi që organizatat studentore tashmë kanë filluar përgatitjet e tyre teknike për zgjedhjet studentore. /Telegrafi/