Universiteti i Prishtinës i 3387-ti për cilësi

Universiteti i Prishtinës në gjuhën shqipe në listën e 20 mijë e 745 universiteteve botërore, është radhitur i 3387-ti për nga cilësia. Kjo listë është publikuar nga agjencia “Ranking Web of World Universites”(Webrenditja e universiteteve botërore).

Kjo është iniciativë e matjeve kibernetike dhe e hulumtimit të Qendrës së Shkencave Humane e Sociale (CCHS), si pjesë e Këshillit Kombëtar të Kërkimit (CSIC).

Është trupa më e madhe publike e kërkimit në Spanjë. Ky këshill është i përkushtuar për analizën sasiore të internetit dhe përmbajtjen e webfaqeve, posaçërisht ato që lidhen me proceset e komunikimit të brezave dhe të dijes shkencore, shkruan koha.

Me këto renditje, Këshilli synon që të sigurojë motivimin ekstra për studiuesit në mbarë botën, për publikimin e më shumë përmbajtjeve shkencore në webfaqe, duke e bërë atë në dispozicion për kolegët dhe njerëzit kudo që ndodhen. “Ranking Web of World Universities” është lansuar zyrtarisht në vitin 2004 dhe përditësohet në çdo 6 muaj.