Ultimatumi i AAK-së për PDK-në!

Prishtinë – Aleanca për Ardhmërinë e Kosovës i jep afat PDK-së që deri në fillim të shkurtit të vendosë për çështjen e koalicionit. Nënkryetari i AAK-së, Ardian Gjini, ka thënë se fillimi i shkurtit duhet të sjellë edhe përgjigje të saktë nga PDK-ja se çka do të ndodhë më tutje, transmeton KTV.

Sipas tij kjo është me rëndësi jo vetëm për AAK-në por edhe për qytetarët, sepse nuk mund të zgjasin tema të tilla për një kohë të pa caktuar. Ai nuk ka dashur të lëshohet shumë në komente duke thënë se tashmë e kanë të qartë të gjithë qëndrimin e AAK-së për qeverisje me Haradinajn kryeministër.

Gjini ka shtuar se kjo parti nuk ka ndryshuar dhe nuk do të ndryshojë qëndrim. Ndërkohë kryesia e AAK-së ka vendosur që në këtë parti të fillojë procesi i brendshëm zgjedhor. Gjini ka pohuar se në mbledhjen e e Kryesisë është diskutuar vetëm për këtë proces por jo edhe për çështjen e koalicionit.

Procesi i brendshëm zgjedhor sipas Gjinit do të fillojë nga 15 janari dhe do të zgjas deri me 15 prill kur edhe do të zgjedhën strukturat udhëheqëse të partisë.