Ultimatum për zgjidhjen e rasteve të korrupsionit

Deri më 30 qershor 2014, të gjitha rastet që kanë të bëjnë me korrupsionin duhet të zgjidhen. Numri i personave që dyshohet se janë të përfshirë në këto vepra penale është 1 mijë e 685 veta. Këshilli Prokurorial i Kosovës (KPK) në takimin e datës 18 tetor 2013, ka obliguar kryeprokurorët e Prokurorive Themelore në shkallë vendi dhe zv/prokurorin e Prokurorisë Speciale, që të hartojnë një plan të veprimit.

“Qëllimi është që jo vetëm të luftohet korrupsioni, por edhe Raporti i Progresit për vitin tjetër i Komisionit Evropian të jetë më pozitiv në këtë pikë”, thotë për Tribunën, një zyrtar i lartë nga prokuroria.

Me këtë plan ata duhet të parashikojnë me saktësi se si do të zgjidhen këto raste duke përfshirë dhe afatin kohor. Tribuna ka kuptuar se me insistimin e kryeprokurorit të Shtetit, Ismet Kabashi, plani i veprimit jo vetëm që është hartuar, por është gati madje tash, një javë para afatit. Kjo për shkak se në mbledhjen e fundit të KPK-së më 18 tetor, afati për prezantimin e këtij plani është vendosur të jetë data 1 nëntor 2013…(Tribuna).