UBT lanson Ekosistemin e parë në Evropë të mbështetur plotësisht nga Inteligjenca Artificiale

UBT lanson zyrtarisht ekosistemin e parë plotësisht të mbështetur nga inteligjenca artificiale në Evropë, duke shënuar një moment historik për zhvillimin teknologjik dhe arsimor në rajon dhe më gjerë.

Ky ekosistem inovativ është ndërtuar për të integruar të gjitha funksionet akademike, kërkimore, administrative dhe shërbimet ndaj studentëve në një platformë të vetme, të menaxhuar dhe të optimizuar nga inteligjenca artificiale. Platforma u mundëson përdoruesve një përvojë të personalizuar, vendimmarrje të bazuar në të dhëna, automatizim të proceseve dhe qasje të menjëhershme në burime të avancuara digjitale.

Përmes këtij ekosistemi, që vendosë përdorimin në tërësi të Inteligjencës Artificiale, të gjithë përdoruesit do të përgatiten në të gjitha fushat, sikurse edukimi, zhvillimi, ndërmarrësia, trajnimet, mentorimi, aftësimi dhe riaftësimi, inovacioni dhe digjitalizimi.

“Me këtë hap, ne jo vetëm që forcojmë rolin tonë si lider në inovacion dhe arsim të avancuar, por gjithashtu hapim rrugën për një të ardhme ku teknologjia është në shërbim të dijes dhe shoqërisë. Ne synojmë që kjo platformë të mos mbetet vetëm brenda UBT-së, por të ofrohet edhe për institucione të tjera arsimore dhe publike, në shërbim të komunitetit dhe zhvillimit të qëndrueshëm të Kosoves”, deklaroi Rektori i UBT-së, Prof. Dr. Edmond Hajrizi.

UBT, si institucion me përvojë të gjatë në zhvillimin e teknologjive të avancuara, synon që këtë platformë ta bëjë të qasshme për partnerë të ndryshëm institucionalë, duke ndihmuar në rritjen e efikasitetit, transparencës dhe inovacionit në sektorë të ndryshëm.