Një burrë ka dhënë me qira banesën e njëjtë për rreth njëzet persona të ndryshëm në Gjenevë. Ai është arrestuar të martën nga policia kantonale. 35-vjeçari ka arritur të fitojë afro 63.000 franga.
Njeriu që aktualisht banon në kantonin e Vaud-it jepte me qira një apartament që i takonte në qytetin e Gjenevës dhe kërkonte nga të interesuarit që të paguajnë paraprakisht qiranë apo shuma parash për depozit. Ai arrinte të gjejë viktimat e tij nëpër faqet e internetit, siç janë anibis.ch e glocals.ch, tregoi policia kantonale në një deklaratë.
Vështirësitë financiare
I akuzuari ka shpjeguar veprimet e tij, duke treguar se ai kishte vështirësi financiare. Ai u arrestua të martën, ndërsa ishte duke i bërë vizitën e apartamentit një personi që dëshironte po ashtu ta mashtronte. Banesa në fjalë ishte e zbrazët, gjë që lehtësonte punën e mashtruesit.
I pandehuri kishte vendosur të japë me qira banesën e tij në dhjetor 2011, për të filluar aktivitetin e tij në shkurt 2012. Policia kishte filluar hetimet për shkak të ankesave që arritën në korrik.(albinfo.ch)
