U dhanë të gjitha shpërblimet e konkursit letrar të “Vjeshtës letrare” kushtuar Idriz Seferit

Gjilan – Në një ambient krejtësisht tjetër të ri, në Bibliotekën Ndërkomunale “Fan S. Noli”, në Gjilan, dje filloi rrugëtimin dy mujor i Manifestimit tashmë tradicional “Vjeshta letrare e Gjilanit”, rrugëtim i teti me radhë me aktivitete të ndryshme letrare e artistike, botime të reja, përurime librash e portrete shkrimtarësh, konkurs letrar etj.

Fillimisht, Sabit Rrustemi, drejtues i Ars Club-it “Beqir Musliu”, tha se sivjet kjo ngjarje është edhe më e veçantë, për faktin se ky eveniment kulturor po mbahet në objektin e ri të bibliotekës së qytetit, Gjilanit, mu në shtëpinë e librit, aty ku frekuentojnë shumë autorë e lexuesve gjilanas e më gjerë. “Është një kënaqësi e veçantë, sepse, këtu ku jemi sot, janë krijuar kushtet për përhapjen e librit, ku lexuesi ynë ka kushte më të favorshme për të absorbuar dije për jetë”.

Pas pikës së parë të “Vjeshtës letrare”, Mehmetali Rexhepi, shkrimtar, tha se, kësaj here, në konkursin letrar të “Vjeshtën letrare”, kanë arritur mjaft shkrime anonime për konkursin shpërblyes kushtuar figurës së Idriz Seferit. Ai shtoi se, këto shkrime kanë mungesë të vlerës së dëshiruar artistike, të cilat “vlera” jurisë iu pamundësua t’i jepte të gjitha shpërblimet e parapara të këtij evenimenti kulturor. Juria ishte e përbërë nga: Mehmetali Rexhepi, shkrimtar dhe studiues, Gjylshen Berisha, profesoreshë dhe Nexhat Rexha, vlerësues dhe krijues, ku, njëzëshëm vendosën t’i jepnin (gati) të gjitha shpërblimet e parapara me konkurs.

Kështu, vendin e dytë iu dha poezisë me titull “Bardhësi rrënjësh”, me shifër (Dy Drinat), vendin e tretë i takoi poezisë me titull “Idriz Seferi” me shifër (Vegimi i Kalorësit). Për ese, juria në fjalë ndau vendin e tretë esesë “Kalorësi që mungoi në Vlorë”, më shifër (Amfiteatri 46). Mandej, për shkrimet në prozë, juria vendin e parë ia dha prozës “Fluturimi i Shqiponjës që bëri historinë”, me shifër (n’Karadak), ndërsa për botim, juria propozoi vështrimin kritik “Karadaku përball rrebesheve të historisë”, shifra (Luftëtarja)./tefik selimi/rajonipress/