U bë promovimi i shoqatës “Parandalo”

Shoqata “Parandalo” u ofron ndihmë të gjithë atyre që kanë rënë në konflikt dhe përjetojnë dhunë në familje apo në shoqëri ose kanë probleme nga varësi të ndryshme

Fundjavën që kaloi, është bërë në Cyrih promovimi i shoqatës “Parandalo”. Bëhet fjalë për një organizim të veçantë brenda komunitetit shqiptar, që dallon për shumëçka nga shoqatat ose subjektet tjera që i kemi njohur deri më tash.

“Parandalo” është themeluar në vitin 2011 dhe ka për qëllim të jetë aktive në parandalimin e konflikteve dhe dukurive të tjera negative që ndodhin në shoqëri.

Shoqata “Parandalo” u ofron ndihmë të gjithë personave, të cilët kanë rënë në konflikte dhe përjetojnë dhunë brenda familjes apo në shoqëri ose kanë probleme nga varësi të ndryshme”, bëhet e ditur në kumtesën që kjo shoqatë ua ka dërguar medieve me rastin e promovimit të saj.

Më tutje, udhëheqësit e shoqatës shpalosin fushëveprimtarinë e tyre duke theksuar se përvoja shumëvjeçare e tyre në këshillime dhe ndërmjetësime ka treguar suksese të mëdha në këtë lami. Por, “në raste të problemeve të cilat nuk i përkasin fushës sonë, ne i udhëzojmë palët drejt qendrave të tjera përkatëse profesionale”, nënvizojnë në “Parandalo”.

Me këtë rast, themeluesit njoftojnë edhe për portalin e ngritur në shërbim të parandalimit.

“Në kuadër te informimit dhe vetëdijesimit të qytetarëve për mbrojtje nga dukuritë negative kemi lansuar platformën www.parandalo.ch, në të cilën mund të gjeni artikuj dhe statistika rreth temës në fjalë”.

Por, ata nuk do të ndalen vetëm në këtë pikë. “Në të ardhmen mendojmë të realizojmë shumë projekte të ndryshme siç janë ligjëratat, kurset dhe manifestime informative”, premtojnë në shoqatë.

Sipas njoftimit, shoqata, për të realizuar synimet e saj, bashkëpunon me organizime të ngjashme në nivel të Zvicrës.

“Një bashkëpunim i mirë me Qendrën federale Zvicerane për parandalimin e krimit, në Bernë (SKPPSC), me një rrjet të gjerë qendrash të ndryshme me objektiva të ngjashme, me Institucione zvicerane, me Ambasada shqiptare, me përfaqësues të firmave, ndërmarrës apo shoqata shqiptare në Zvicër, e bën veprimtarinë tonë edhe më kualitative dhe domethënëse.

Është e rëndësishme të kuptojmë që krimi nuk ka përkatësi kombëtare, fetare apo kulturore. Ky prodhon vetëm viktima dhe keqbërës, prandaj angazhimi ynë udhëhiqet me thënien e lashtë shekullore „Më mire të parandalojmë, se të shërojmë!“ dhe u ofrohet të gjithë atyre qe kanë nevojë”, thuhet në përmbyllje të njoftimit për medie që shoqata “Parandalo”, respektivisht kryetarja e saj, Valdete Hoti e ka dhënë me rastin e promovimit të saj publik.

Të interesuarit për më shumë, mund të drejtohen në portalin (www.parandalo.ch)