Trusti regjistroi mbi 300 milionë euro fitim në vitin 2025

Fondi i Kursimeve Pensionale të Kosovës (Trust) ka regjistruar një fitim bruto prej 312 milionë euro, deri më 24 dhjetor të këtij viti.

Trusti ka njoftuar se për vitin 2024 kthimi bruto nga investimet ishte 244 milionë euro. Në njoftimin e Trustit është thënë se për dy vjet janë akumuluar kthim bruto nga investimet prej 566 milionë euro.

“Fondi i Kursimeve Pensionale i Kosovës deri më 24 dhjetor 2025 e ka akumuluar një kthim bruto nga investimet prej 312 milionë euro për këtë vit. Meqë për vitin 2024 kthimi bruto nga investimet ishte rreth 244 milionë euro, rezulton se vetëm në dy vjetët e fundit FKPK-ja ka akumuluar kthim bruto nga investimet prej rreth 556 milionë euro. Ky njëkohësisht ishte viti i 21-të, nga gjithsej 24 vjet të operimit të FKPK-së, që institucioni arrin kthim vjetor pozitiv nga investimet. Llogaritur në tërësi, kthimi i akumuluar bruto, prej themelimit e deri në këtë datë të raportimit ka arritur në rreth 1.3 miliardë euro. Arkëtimi i kontributeve të reja në 2025-shin, aktualisht në vlerë prej 354 milionë euro, pasqyron një ngritje solide, si në vlerë nominale (prej +36 milionë euro) ashtu edhe në përqindje, prej 12%, nga viti paraprak”, është njoftuar nga Trusti.