Truri deficitar paguhet më shumë se Thaçi

Qeveria e Kosovës po vazhdon të bëjë diskriminime brenda administratës shtetërore duke i shpërblyer me “ekstra paga” një ekip prej 224 nëpunësish civilë, nën arsyetimin se ata janë kuadro deficitarë.

Për t’i mbajtur brenda Qeverisë, kryeministri Hashim Thaçi ka vendosur që disave prej tyre t’ua japë deri 1 mijë e 800 euro në muaj, edhe pse vetë paguhet jo më shumë se 1 mijë e 440 euro.

Pagesat ekstra për nëpunësit civilë po bëhen nga Fondi për Kuadro, që ndryshe njihet edhe si Fondi i trurit, i miratuar në Qeveri më 24 dhjetor 2008. Ky fond, mbushet për çdo vit nga buxheti i shtetit me nga një milion.

Gazeta Tribuna ka arritur të sigurojë listën e plotë të të “privilegjuarve” nëpër dikasteret e administratës civile dhe sipas kësaj liste, Ministria e Drejtësisë del se ka më së shumti zyrtarë që stimulohen me të hyra shtesë. Gjithsej aty janë 34 zyrtarë në mesin e të cilëve përfshihen drejtorë departamentesh, zyrtarë ligjorë dhe drejtorë të qendrave korrektuese./Indeksonline/