Trotuari i bashkon Radivojcin me Kllokotin

Gjilan – Ministria e Pushtetit Lokal ka ndarë 78 mijë euro për të rregulluar trotuarin Kllokot – Radivojc. Trotuari lehtëson qarkullimin e banorëve dhe në veçanti të nxënësve.

Fshati Radivojc që llogaritet njëri nga fshatrat më të mëdha të Vitisë tash së fundit ka përfituar një investim kapital i cili mendohet ta përmirësojë infrastrukturën e fshatit, por edhe të rritë sigurinë e banorëve.

Ministria e pushtetit Lokal ka ndarë 78 mijë e 731 euro për të realizuar ndërtimin e trotuarit dhe kanalizimin atmosferik Kllokot -Radivojc. Ky projekt përcillet edhe me rregullimin e kanalizimit atmosferik që ka një gjatësi prej 1500 metrave. Banorët e këtyre dy fshatrave janë të lumtur që ky projekt po jetësohet meqë rruga magjistrale që ka kaluar përskaj tyre ka rrezikuar jetën e fëmijëve të cilët është dashur të kalojnë rrugën për të shkuar në shkollë.

Sadri Sherifi menaxher në zyrën e projekteve tha për rajonipress se ky trotuar pos që e lidhë Radivojcin me Kllokotin mundëson edhe lëvizjen e banorëve,pastaj eliminohet rreziku që kanë pasur nxënësit tek udhëkryqi, ku edhe ka pasur aksidente të shumta.

Sherifi tha se fshati Radivojc që ka 250 shtëpi është përfitues edhe i rregullimit të kanalizimit fekal në vlerë të 120 mijë eurove i cili veç është në përfundim e sipër. “Në këtë projekt komuna është nxitur edhe nga komuniteti të cilët kanë participuar me 40 mijë euro” tha Sherifi.

Gjithashtu në Radivojc pritet të rregullohet rrethoja e fushës së sportit tek shkolla.

Kompania e cila po kryen punimet “Magjistralja” janë të kënaqur me ecurinë e punëve. Abdyl Pireva nga “Magjistralja” tha se nuk kanë pasur telashe e as probleme rreth realizimit dhe se puna sipas tij po bëhet duke u bazuar në kriteret e parapara me projekt./rajonipress/

Shpërndaje.
© RAJONIPRESS