“Trepça” e përfundon këtë vit me sukses

Për gjigantin “Trepça” viti që po e lamë pas konsiderohet njëri prej viteve më të suksesshme të pasluftës. Në një intervistë për Radio Kosovën, ushtruesi i detyrës së drejtorit në këtë ndërmarrje, Halil Qela deklaroi se është i kënaqur me punën që është bërë gjatë këtij viti, mirëpo sipas tij ende mbetet shumë punë për tu bërë që ”Trepça” të jetë si në vitet e saj më të mira.

Ai tha se nga viti në vit ka rritje të prodhimit, por që ende ka probleme që e vështirësojnë punën e “Trepçës”. Sipas tij meritat më të mëdha për të arriturat dhe punën që është bërë e kanë vetë minatorët.

Qela tha se për të gjithë fëmijët e minatorëve do të ketë privilegj sa herë të shtrohet nevoja për punëtorë të rinj. Sipas tij shumë minatorë janë në kushte të vështira ekonomike, sepse nuk kanë mundur të kthehen në vendet e tyre të punës nga koha e dëbimit dhe paslufta.

Ai i ka uruar minatorët që viti 2014, të jetë një vit më i suksesshëm për të gjithë, dhe njëherësh ka thënë se “Trepça”, është në rrugë të mbarë që të jetë shtylla kryesore e ekonomisë së Kosovës.