Tre shqiptarë në Botërorin U-17

Tre futbollistë shqiptarë po paraqiten në Kampionatin botëror për lojtarët deri në 17 vjeç. Botërori që nisi më 17 tetor e përfundon më 8 nëntor po mbahet në Emiratet e Bashkuara Arabe.

Pjesë e Suedisë janë Valmir Berisha (në foto) dhe Gentrit Çitaku. Suedia ndeshjen e parë në kuadër të Grupit F e luan të sot kundër Irakut.

Berisha luan në sulm, ndërsa është pjesë e klubit Halmstad. Ai për U-17 të Suedisë ka luajtur 10 herë, ndërsa ka realizuar gjashtë gola. Ka edhe dy paraqitje për U-19.

Mesfushori Gentrit Çitaku luan për Norrkopingun. Në 17 paraqitje për U-17 ka shënuar pesë gola, ndërsa edhe ai luajti dy herë për U-19.

Lojtari i tretë shqiptar është pjesë e Kroacisë dhe ai është sulmuesi Elvir Maloku. Ai të premten luajti tërë ndeshjen, të cilën Kroacia e humbi nga Maroku me shifrat 3:1.