Trajneri Lorik Ilazi pas fitores së Kupës i emocionuar është shprehur: Drita ime – Jeta ime

Gjilan – Njëri ndër trajnerët më të mirë që ka pas volejbolli i Kosovës padyshim është trajneri i Dritës, Lorik Ilazi, apo më mirë të themi “trajneri i kupave”.

Atë që e kanë e bërë me herët Lah Nimani në boks, Mentaz Allajbegu në mundje, Driton Kuka në xhudo, Lorik Ilazi po e bën në Volejbollin e Kosovës dhe me të drejt mund ta quajmë trajner i titujve e Kupave.

Trajneri Lorik Ilazi, këtë e dëshmoi edhe mbrëmë në finalen e Kupës së Kosovës, ku për herë të gjashtë KV Drita stoliset me Kupën e Kosovës. Ilazi, KV Dritën e ka shndërruar në fidanishte të talenteve të volejbollit, të cilat po mbajnë barrën jo vetëm në KV Drita, por edhe në klubet tjera e në Përfaqësuesen e Kosovës në Seniore e Juniore.

Në faqen e tij në ‘facebook’, trajneri i vashave të Dritës, ka bërë të ditur. “Kupa e gjashtë me shije të njëjtë si e para, me dashuninë e emocionin e njëjtë, ishte një finale triller me shumë angazhim e sakrifice, që i shton peshën e rëndësinë trofeut më të çmuar të volejbollit të Kosovës”.

Ilazi njeherit ka falënderuar FVK-së për organizimin e finales, duke theksuar se ishte super organizim të nivelit evropian.

Po ashtu, trajneri Lorik Ilazi, ka falënderuar përjetësisht për mbështetje tifozët “Intelektualët” dhe Komunën e Gjilanit.

Të gjitha këto suksese nuk do të arriheshin pa njerëzit të cilët e mbështesin KV Drita, e Ilazi nga zemra i ka falënderuar ish-presidentin e KV Drita, Jakup Shabanin, presidentin e FC Drita dhe pronarin e Rinora 4, Flamur Bunjaku.

Ky sukses sipas Ilazit, iu takon vajzave dhe njerëzve që na mbështesin pa rezervë dhe gjithë djersa jonë e sakrificën që bëjmë është për KV Drita, krenaria e qytetit dhe tifozët më të mëdhenj në botë “Intelektualët”./rajonipress/