Tito iu shkruan ish komunistëve gjilanas

Nga Demir Krasniqi – Të dashur, ish – komunistët e mi besnikë ! E di , që shumë prej jush , keni qenë bashkëpunëtorë besnikë dhe lojalë të rrugës dhe ideologjisë sime komuniste . Mortja më mori mu në kohën kur ju kishit më së shumti nevojë për përkrahjen , përkëdheljen dhe ledhatimin tim .

E di , se nuk e keni të lehtë që t’iu përballoni vuajtjeve , mallit dhe nostalgjisë për mua !
E di , se në kohën më të vështirë , ju lashë jetimë , si zogjtë pa pulë.

E di , se nuk e keni të lehtë që t’iu përshtateni kërkesave të demokracisë dhe të jeni të dëgjueshëm , sepse , ju jeni mësuar vetëm të urdhëroni , të komandoni , të distanconi , të suspendoni , të burgosni e të likuidoni pa gjykime !

E di , se tash e keni të vështirë të bëni gjumë të rehatshëm , nga ata që i keni përndjekur , nëpërkëmbur , persekutuar dhe likuiduar !
Por, Ju lus , që të bëheni të fortë , ashtu siç keni qenë të fortë gjithmonë , nën ombrellën time !

Ju, duhet të jeni krenarë që i keni takuar një epoke aq të hekurt !
Keni prerë dhe qepur ashtu siç keni dëshiruar vet !
Ju, duhet të jeni krenarë , që për hir të emrit tim, veprës sime të lavdishme dhe vizionit tim , keni bërë edhe të pamundshmen për mbrojtjen dhe kujtesën time të përjetshme !
Ju, duhet të jeni krenarë , që keni derdhur djersë e mund , për të mbjellë nga 88 fidanë , nëpër fshatrat , arat e livadhet , ku Ju keni kullotur më së shumti !
Ju, duhet të jeni krenarë , për mundin që keni konsumuar , duke ma shkruar emrin tim , kudo nëpër male , kodra , rrugë, sheshe, shkolla, institucione dhe në zemrat Tuaja !
Ato ishin lavdia dhe krenaria Juaj !

Ju, duhet të jeni krenarë , që ende në mesin Tuaj , jetojnë dhe ngritën lartë përmendoret e mia, si kala përjetësie , që nuk mund t’i rrënojë as tërmeti , as lufta , as furtuna, as dora e njeriut !

Ndër përmendoret e këtilla , pa dyshim , vend meritor në librin e historisë sime , do të zë ndërtimi i Shkollës Fillore “Abaz Ajeti”, në Gjilan , ballë për ballë Kompleksit të Varrezave të “Vëllazërim – Bashkimit” dhe me ballë e shikime drejt Beogradit!
Shkollë kjo, të cilën e keni nisur enkas në shenjë përkujtimi e nderimi ndaj meje dhe veprës sime .
E di , se nuk e keni pasur të lehtë , nga irredentistët dhe separatistët Tuaj , që ta ndërtoni atë shkollë , mu në formën e shkronjës sime të parë :”T”, e cila simbolizon emrin tim – TITO!

E di , se kjo është e vetmja shkollë në Kosovë dhe në shtatë njësitë tjera federale të ish Jugosllavisë Socialiste , që mbanë me krenari këtë simbol arkitekture edhe sot e kësaj dite!

E di , se keni pasur dëshirë të madhe , që pas vdekjes sime , këtë Shkollë ta pagëzoni me emrin tim: JOSIP BROZ TITO , por pasi që ra komunizmi , Ju e pagëzuat atë , me emrin e kolegut , mikut , bartësit dhe bashkëpunëtorit tim më të ngushtë , të ngratit : ABAZ AJETI !

E gëzoftë këtë emër për jetë e mot !

Ju, duhet të jeni krenarë , që fëmijët Tuaj , marrin mësim dhe edukim në atë Shkollë !
Sa herë që do të hyjnë në oborrin e saj , sa herë që do të rreshtohen , do të kujtojnë me mall e respekt emrin dhe veprën time !

Ju, duhet të jeni krenarë me fëmijët Tuaj , sepse , sa herë që do ta mësojnë shkronjën “T”, do ta kenë më lehtë për ta shkruar dhe vizatuar , nga se e kanë modelin e shkollës , si mjet të përsosur konkretizimi !

Pra, Ju lumtë , të dëgjueshmit dhe të ledhatuarit e mi besnikë !
Ju lumtë , që ishit dhe mbetët të paluhatshëm në rrugën , veprën dhe ideologjinë time komuniste !

Bile , Ju ishit shumë më të paepur , se sa ata bashkëpunëtorët e mi bashkëvendës dhe bashkëkombës nga Kumrovci i lindjes sime !

Ju përshëndetë me mall e përqafime , i Juaji – JOSIP BROZ TITO , i paharruar nga Bota e Amshuar!

Gjilan, më 06.10.2013.