Tiranë: Ekspozitë me veprat e Podrimjes

Në nder të poetit dhe shkrimtarit, Ali Podrimja, Biblioteka Kombëtare në Tiranë ka organizuar një ekspozitë me fondin e veprave të tij.

Shefi i sektorit të Bibliografisë në Bibliotekën Kombëtare, Maksim Gjinaj, deklaroi për mediat tiranase se në fondin e botimeve të Podrimjes biblioteka ka rreth 70 vepra të tij. Sipas Gjinajt, Podrimja mbetet njëri ndër autorët më të kërkuar.

“Kemi organizuar këtë ekspozitë sapo morëm vesh për lajmin e hidhur të vdekjes së poetit të mirënjohur, Ali Podrimja. Të pranishme në këtë ekspozitë janë të gjitha veprat e Ali Podrimjes, pra, rreth 70 titujt që ndodhen në fondet e Bibliotekës Kombëtare. Ai është ndër autorët më të lexuar.

“Është i pranishëm jo vetëm në auditorin e gjerë dhe te lexuesit e përhershëm të Bibliotekës Kombëtare, por është edhe pjesë e mirëfilltë e programeve shkollore”, u shpreh shefi i sektorit të Bibliografisë, Maksim Gjinaj.