Tifozat Kuq e Zi: Shqiptarë të Zvicrës mos luani kundër Shqipërisë

Tifozët e Kombëtares shqiptare, ‘Tifozat Kuq e Zi’ të martën u janë drejtuar me një letër të hapur shqiptarëve të Zvicrës, prej të cilëve kanë kërkuar që të refuzojnë të luajnë ndaj ekipit shqiptar.

“Meqenëse keni rrënjë shqiptare dhe nuk ndiheni rehat të luani kundër kombit të rrënjëve tuaja (ashtu siç edhe deklaroni nëpër media), ju kërkojmë që të mos luani në ndeshjen kundër Shqipërisë në Tiranë”, thuhet në letrën e hapur të Tifozave Kuq e Zi.

“Mendojmë se në këtë mënyrë do të jeni korrektë edhe me ngjyrat që i prezantoni, pasi që ata do t’ju kuptojnë. Nëse veproni ndryshe dhe nuk jeni në ditën e juaj më të mirë, atëherë zviceranët do t’ju quajnë ‘tradhtarë’. Mirëpo, nëse eventualisht shënoni gol, atëherë ne, bashkëkombësit e juaj (shqiptarët), do t’ju quajmë po me të njëjtin emër”, thuhet më tej në letrën e tifozëve shqiptarë, të cilët besojnë se kjo do të ishte varanti më i miri për Shqipërinë, Zvicrën dhe gjashtë lojtarët e saj.