Thirrje për zgjedhje të drejtpërdrejta presidenciale në Kosovë: Presidenti të zgjidhet nga populli

Karaçevë – Nisma qytetare e rrjedhur nga brezi kufitar ka dalë me një thirrje publike, përmes së cilës kërkon që Presidenti i Republikës së Kosovës të zgjidhet drejtpërdrejt nga qytetarët, duke e cilësuar këtë si një hap të domosdoshëm drejt forcimit të demokracisë dhe përputhjes me standardet ndërkombëtare. Sipas kësaj nisme, sovrani i Kosovës, populli, duhet ta ketë të drejtën ekskluzive për të zgjedhur kreun e shtetit. “Është legjitime dhe demokratike që qytetarët e Kosovës ta zgjedhin vetë Presidentin e Republikës. Populli vendos dhe e vulos mandatin, ndërsa institucionet kushtetuese dhe gjykatat e certifikojnë atë,” thuhet në deklaratë ka thënë Selver Lenjani.

Në reagimin e Selver Lenjanit theksohet se demokracia në Kosovë ende nuk është plotësisht në harmoni me normat demokratike dhe standardet ndërkombëtare, duke vlerësuar se demokracia e mirëfilltë do të realizohet vetëm atëherë kur Presidenti të zgjidhet përmes votës së drejtpërdrejtë të qytetarëve.

Nisma i referohet praktikave në rajon dhe më gjerë, duke përmendur se në shumicën e vendeve të Ballkanit, Evropës dhe botës, kreu i shtetit zgjidhet nga populli. Si shembull përmendet Maqedonia e Veriut, ndërsa kërkohet që edhe Kushtetuta e Kosovës të harmonizohet në këtë drejtim, duke ia kthyer këtë të drejtë sovranit, qytetarëve të Kosovës.

Në deklaratë u drejtohet thirrje Gjykatës Kushtetuese, Gjykatës Supreme, partive politike dhe institucioneve më të larta shtetërore, që të mbështesin ndryshimet e nevojshme ligjore dhe kushtetuese për zgjedhjen e drejtpërdrejtë të Presidentit.

“Presidenti ose Presidentja e Republikës së Kosovës duhet të zgjidhet nga qytetarët. Kushdo që dëshiron të kandidojë le të garojë, ndërsa populli të vendosë,” theksohet më tej, duke shtuar se legjitimiteti i kreut të shtetit buron drejtpërdrejt nga vota e qytetarëve.

Autorët e thirrjes theksojnë se ka ardhur koha që roli vendimmarrës t’u kthehet qytetarëve dhe jo të mbetet në duart e marrëveshjeve partiake. “Mjaft me rotacion partiak, tani është radha e popullit. Populli flet, vendos dhe e vulos vendimin,” thuhet në deklaratën e nënshkruar nga Selver Lenjani.

Në përfundim, nisma dhe iniciativa e brezit kufitar shpreh shpresën se zgjedhjet presidenciale të vitit 2026 do të shënojnë një kapitull të ri demokratik për Kosovën, me një President të zgjedhur drejtpërdrejt nga qytetarët./rajonipress/