Kompanitë ndërtimore gjenden në krizë të thellë financiare. Ato kanë nisur të konkurrojnë nëpër tenderë qeveritarë me çmime përgjysmë më të lira se dy vjet më parë, vetëm për të qarkulluar pak të hyra dhe për të marrë kredi nëpër banka.
Kjo situatë konsiderohet se është shkaktuar nga ndërtimi i autostradës “Ibrahim Rugova”, për të cilin projekt harxhohet çdo vit 50-përqindëshi i buxhetit për investime kapitale.
Nëse një kompani ndërtimore ka konkurruar para dy vitesh me një çmim prej një mijë eurosh për një metër katror të asfaltit, sivjet konkurron me çmim përgjysmë më të lirë.
Kjo oferta vjen në kohën kur çmimet e asfaltit, i metaleve dhe karburanteve janë shtrenjtuar shumë apo dyfishuar.
Kjo situatë i ka habitur ekonomistët.
Ata i rendisin një sërë faktorësh që kanë ndikuar në këtë krizë të bizneseve të ndërtimit, por si shkaktar kryesor konsiderojnë ndërtimin e autostradës “Ibrahim Rugova”. Për këtë projekt harxhohet 50-përqindëshi i buxhetit të ndarë për investime kapitale, që do të thotë se nga këto mjete privohen biznesmenët lokalë.
Kriza në biznesin e ndërtimit konfirmohet nga vetë ndërtimtarët.
Ata thonë se kriza i ka degdisur keq dhe që të gjitha janë në gjendje që edhe të mos fitojnë, vetëm të qarkullojnë pak para në kompani.
Qëllimi i ndërtimtarëve për të marrë edhe kontrata që s’fitojnë me to, është që të komunikojnë apo t’i bindin bankat që t’u lëshojnë ndonjë kredi.(Express)
