Thaçin e faktorizon dialogu

Dialogu me Serbinë në nivel presidentësh shihet si mundësi për Hashim Thaçin, që të faktorizohet ndërkombëtarisht.

Rishikimi i formatit të dialogut me Serbinë duke e zhvendosur atë në nivel presidencial, kërkesë kjo direkte e presidentit të Kosovës, Hashim Thaçi, shihet si përpjekje e tij që të faktorizohet ndërkombëtarisht. Që nga ardhja e tij në krye të këtij posti, Thaçi po bën përpjekje të shtuara që ta ndryshojë qasjen ndaj dialogut edhe pse në vazhdimësi opozita kërkon të mos vazhdohet ky dialog pa njohjen e Kosovës nga Serbia, shkruan sot gazeta ‘Zeri’.

“Ajo që kam deklaruar edhe më herët dhe që dua ta fuqizoj edhe këtu është se ky dialog i Brukselit nuk duhet të shndërrohet në një proces monoton dhe rutinë. Prandaj kërkohet avancim i këtij procesi, dinamizëm dhe një energji e re drejt marrëveshjeve të reja që do të çonin drejt një raporti të ri ndërfqinjësor, një miqësie kosovaro-serbe mes vendeve dhe popujve tanë dhe një pajtimi mes vendeve dhe popujve tanë”, ka thënë presidenti Thaçi ditë më parë./zeri/