Thaçi: Zgjidhja, duke respektuar votën dhe parimet kushtetuese

Kryetari i Partisë Demokratike të Kosovës, Hashim Thaçi theksoi se takimi me presidenten Jahjaga ishte takim korrekt nga e cila u informuar për angazhimin e saj rreth zgjidhjes së ngërçit politik.

“Ne inkurajojmë presidenten Jahjaga që të kontribuojë në gjetjen e zgjidhjes. Gjithashtu jemi për atë që të komunikojmë edhe me të tjerët për të gjetur një zgjidhje për të ardhmen e vendit, perspektiven e vendit tonë”, tha Thaçi.

Megjithatë shtoi ai, zgjidhja gjithsesi do të duhej të jetë e bazuar në vullnetin e votës së qytetarëve në zgjedhjet e 8 qershorit, si dhe në vendimet e Gjykatës Kushtetuese.

“Marrëveshja mund të arrihet falë vullnetit të mirë, duke respektuar votën dhe parimet kushtetuese”, ka vlerësuar Thaçi.

Sa i përket takimit të përbashkët të VLAN, sot në Kuvendin e Kosovës, si dhe rreth faktit se asnjëra nga partitë politike të VLAN nuk duan të takohen dhe të bisedojnë me PDK-në, Thaçi thënë se askush nuk mund të veprojë në mënyrë të një anshme.

“Parimi i demokracisë është komunikimi. Ftesa është të ulemi, të takohemi, bisedojmë dhe të gjejmë zgjedhje”, ka thënë në fund lideri i PDK-së. /Telegrafi/