Thaçi: Unë Kryeministër, LDK-AAK-NISMA po ia bëjnë vetit qejfin

Kryeministri i Kosovës në detyrë, njëherësh kryetar i PDK-së, Hashim Thaçi ka thënë se institucionet e reja do të formoheshin po të mos arrihej marrëveshja politike bllokuese dhe jokushtetuese e partive që kanë humbur zgjedhjet.

Kryeministri në detyrë ka bërë me dije se rruga e vetme kushtetuese për ta tejkaluar ngërçin politik është që më 12 shtator kandidati i PDK-së të marrë postin e kryetarit të Kuvendit. Alternativat tjera, sipas tij, janë të paarritshme.

Lideri i PDK-së ka vlerësuar se liderët e bllokut po vazhdojnë t’ia bëjnë qefin njëri-tjetrit.

Thaçi ka bërë me dije se nuk do të heqë dorë nga posti i kryeministrit, pasi me këtë përgjegjësi e kanë ngarkuar qytetarët më 8 qershor.

Ai në një intervistë për Epokën e re që botohet e plotë në numrin e së shtunës, po ashtu ka thënë se qeveria e ardhshme do të ketë përfaqësim të gjerë politik. “Kosova në këto momente ka nevojë për bashkim, jo për ndarje të nxituara nga egot e liderëve politikë”, ka thënë ai.