Thaçi: Politika e Kosovës, e përputhshme me atë të Amerikës

“Agjenda jonë politike është e përputhshme me agjendën e qeverisë amerikane”, ka shkruar Thaçi në Facebook.

Politikat qeverisëse të Kosovës, përputhen me ato të Qeverisë së Shteteve të Bashkuara të Amerikës.

Kështu ka thënë Presidenti i Kosovës Hashim Thaçi gjatë fjalimit të tij në festën e organizuar nga Ambasada e Amerikës në Prishtinë, për nder të pavarësisë së SHBA-ve.

Thaçi thotë se Kosova dhe Amerika, kanë një miqësi e cila s’do të përfundojë asnjëherë.

“Sonte festuam Ditën e Pavarësisë së Amerikës, aleatit strategjik dhe popullit të dashur dhe mik të shtetit tonë. Në fjalim para mysafirëve të shumtë, duke përfshirë senatoren amerikane nga Iowa, Joni Ernst, komandantin e ri te Forcave Supreme të NATO-s për Europë, gjeneralin Curtis M. Scaparrotti, gjeneralmajorin e Gardës Kombëtare të Iowa-s, Timothy Orr, ambasadorin amerikan, Greg Delawie dhe drejtorin e DASH për Çështje të Evropës, Thomas Yazdgerdi, e potencova miqësinë e thellë që kemi por edhe detyrimet që dalin nga kjo marrëdhënie historike”.

“Agjenda jonë politike është e përputhshme me agjendën e qeverisë amerikane”, ka shkruar Thaçi në Facebook.

Presidenti nuk ka lënë pa e përmendur ratifikimin e marrëveshjes së Kosovës me Malin e Zi në kuvend, dhe thotë se ky është i vetmi kriter që duhet plotësuar në mënyrë që si kosovarë, të lëvizim pa viza në Europë.

“Në afat të shkurtër duhet ta përmbyllim demarkacionin si kriter i mbetur për lëvizje të lirë në Europë, e në rrugëtimin afatgjatë duhet të luftojmë korrupsionin dhe ekstremizmin, dy rreziqe thelbësore që mund të na dëmtojnë rrugëtimin tonë drejt NATO-s dhe BE-së. Zoti e bekoftë Kosovën, SHBA-në dhe miqësinë tonë të palëkundur”.