Hoti: Jo, LDK-ja s’do të ketë marrëveshje me askënd që ka synim shkatërrimin e vendit

Deputeti i LDK-së, Avdullah Hoti ka reaguar përmes profilit të tij zyrtar në rrjetin social Facebook mbi propozimin e kësaj partie për qeveri nacionale të tranzicionit.

Ai thotë se LDK-ja e ka të qartë vullnetin e elektoratit të vetë, dhe se nuk duhet të ketë e as nuk do të ketë marrëveshje me askënd që ka synim shkatërrimin e kësaj partie dhe shkatërrimin e vendit.

“JO! LDK e ka të qartë vullnetin e elektoratit të vet. Nuk mund askush të flasë për vullnetin e elektoratit tonë. Nuk duhet të ketë dhe nuk do të ketë marrëveshje me askënd që ka synim shkatërrimin e LDK-së dhe shkatërrimin e vendit. Zoti e bekoftë Lidhjen Demokratike të Kosovës”, ka shkruar Hoti në Facebook.

Ndryshe, kryetari i LDK-së, Lumir Abdixhiku para mediave njoftoi se ka refuzuar bashkëpunim vetëm me VV-në, ndërkohë ka ftuar në takim të gjitha partitë politike shqiptare për të diskutuar mbi një qeveri nacionale të tranzicionit.

Deri në këto moment, vetëm kreu i AAK-së, Ramush Haradinaj i është përgjigjur pozitivisht ftesës së tij.