Thaçi mund ta blejë postin

Beteja për presidencën nis muaj më herët.Deputetët mund të ‘shiten’ në votimin për presidentin

“Siguria e zgjedhjes së Thaçit president është mjaft e vogël, për arsye se ai ka kundërshtarë edhe brenda vetë partisë së tij. Me siguri që, duke pasur parasysh këtë situatë, do të futen në lojë mjete të ndryshme, si shantazhet, paratë dhe joshjet me pozita dhe forma të tjera, vetëm e vetëm që të arrihen qëllimet e tyre”, tha deputeti Adem Salihaj për “Kosova Sot”

Derisa po afrohet koha e zgjedhjes së presidentit të ri të Kosovës, që sipas marrëveshjes PDK-LDK duhet të jetë Hashim Thaçi, brenda Lidhjes Demokratike ka zëra që deri më tani janë deklaruar kundër. Ky kundërshtim, i cili, sipas burimeve të gazetës, është në rritje e sipër, ka gjasa serioze që ta rrezikojë seriozisht zgjedhjen e kreut të PDK-së president të ardhshëm të vendit.

Të deklaruar hapur kundër kandidaturës së Thaçit janë deputetët: Vjosa Osmani, Arben Gashi e Adem Salihaj, ndërkohë përflitet që i gjithë grupi i deputetëve të LDK-së që votuan kundër Qeverisë ‘Thaçi’ në vitin e kaluar janë duke u angazhuar që të përfitojnë edhe deputetë të tjerë për të kundërshtuar zgjedhjen e Thaçit president të Kosovës.

Kundër Qeverisë ‘Mustafa’ dhe koalicionit me PDK-në patën votuar: Vjosa Osmani, Armend Zemaj, Arben Gashi, Fatmir Rexhepi dhe Doruntinë Maloku. Deputetja Alma Lama dhe deputeti Adem Salihaj s’mbajtën qëndrim – abstenuan, ndërsa deputeti Anton Çuni nuk ishte fare i pranishëm në sallë. Gazeta i ka kontaktuar disa prej tyre, por nuk ka marrë përgjigje të prerë./kosova sot/