Thaçi i betohet vetëm pozitës

Hashim Thaçi edhe zyrtarisht dje ka marrë detyrën e re, atë të presidentit të Kosovës. Pas më shumë se një muaj kur u votua në Kuvendin e Kosovës, ai dha betimin në një seancë solemne, por që munguan opozita dhe një numër i deputetëve të Lidhjes Demokratike të Kosovës.

Në këtë seancë të rëndësishme për ish-liderin politik të UÇK-së nuk ishin të pranishëm përfaqësues të familjes së Adem Jasharit, familjes Haradinaj, por edhe personalitete të tjera të jetës publike në Kosovë. Menjëherë pas betimit, presidenti i ri i Republikës së Kosovës, Hashim Thaçi, tha se marrja e përgjegjësive të reja si kreu i shtetit, është një moment i veçantë në jetën e tij.

Ai tha se është moment i krenarisë dhe përgjegjësisë, derisa theksoi se është i nderuar që ishte pjesë udhëheqëse e të gjitha vendimmarrjeve për lirinë, pavarësinë dhe konsolidimin e shtetit modern të Kosovës.

“Si kryeministër i vendit kam shërbyer me tërë energjinë, për të mirën e të gjithë qytetarëve të Kosovës. Kosovën bashkërisht e kemi ndryshuar. Tani do të jem në detyrë të re, me përgjegjësi të re. Për një Kosovë të re, demokratike, evropiane dhe multietnike”, theksoi Thaçi. Presidenti i ri shtoi se ka shpresë dhe besim në vendin tonë dhe në qytetarët tanë, në institucionet e Kosovës, në Parlament dhe në Qeverinë e vendit, duke shprehur besimin se do të vazhdohet me qeverisje të mirë. Por nuk la pa përshëndetur edhe paraardhësen e tij, Atifete Jahjaga, duke e falënderuar atë për kontributin gjatë mandatit të saj, si unifikuese e faktorit politik dhe qytetar të Kosovës./zeri/