Thaçi “errësoi” arsyen e dëbimit të gylenistëve

Mosbashkëpunimi i presidentit Hashim Thaçi me Komisionin Hetimor Parlamentar për rastin e dëbimit të gjashtë gylenistëve ka shkaktuar dështimin e hartimit të raportit për këtë çështje, shkruan sot Gazeta “Zëri”.

Komisionit Hetimor Parlamentar për dëbimin e gjashtë shtetasve turq i ka përfunduar mandati në dhjetor të 2018-s dhe ende nuk ka arritur ta përgatisë raportin për arsyet e dëbimit të gylenistëve nga Kosova.

Ndër shkaktarët e shumtë që kanë penguar përfundimin e këtij raporti është edhe presidenti i Kosovës, Hashim Thaçi.
Kryetari këtij Komisioni, Xhelal Sveçla, thotë për “Zërin” se mosintervistimi i presidentit Thaçi për dëbimin e gylenistëve ka lënë shumë zbrazëti në përpilimin e raportit final. Megjithatë, ky Komision ka kërkuar një muaj afat shtesë për ta hartuar përfundimisht raportin, shkruan Gazeta “Zëri”

Më datë 29 mars të vitit të kaluar 6 shtetas turq u ekstraduan për në Turqi, të cilët kishin qenë të përndjekur nga ky shtet për shkak të lidhjeve të tyre me Fetullah Gylenin, i cili akuzohet nga autoritetet turke si organizator i grusht shtetit ndaj presidentit turk Rexhep Taip Erdogan.