Thaçi: Do të jemi më të fuqishëm këtë vit

Kryeministri i vendit, Hashim Thaçi ka deklaruar në mbledhjen e kabinetit qeveritar të mbajtur të mërkurën se ekzekutivi i vendit gjatë vitit 2013 do të ketë prioritet procesin e njohjeve të shtetit të Kosovës, zhvillimin ekonomik, zvogëlimin e papunësisë dhe fuqizimin e sundimit të ligjit. Gjithashtu janë përmendur edhe një sërë prioritetesh të tjera.

Thaçi që në fillim të mbledhjes ka kërkuar përkushtimin dhe angazhimin e secilit ministër që të përmbushen prioriteteve që i ka paraparë ekzekutivi i vendit.

Shefi i ekzekutivit të vendit ka thënë se këtë vit Kosova do të jetë më e fuqishme në rrugën e saj drejt integrimit në NATO dhe BE.

“Viti 2013 është vit i shënimit të 5 vjetorit të pavarësisë së Kosovës, në të cilin do ta bëjmë Kosovën edhe më të fuqishme. Kosova do të shënojë progres substancial edhe sa i përket rrugës së integrimit në NATO dhe Bashkimit Evropian”, ka theksuar Thaçi.

Për më tepër ai ka shtuar se viti 2013 do të shënojë përmirësimin në procesin e njohjeve të reja për Republikën e Kosovës nga vendet që ende janë në proces të njohjes.

Po ashtu, ai ka thënë se këtë vit do të fillohet me planin e ri të punës së Qeverisë, i cili do të jetë plan i zhvillimit ekonomik, zbutjes së papunësisë dhe fuqizimit të sundimit të ligjit.

Në aspektin e zhvillimit ekonomik, ai ka thënë se do të përkrahet zhvillimi rural dhe luftimi i ekonomisë informale.

“Sa i përket prioritetit të zhvillimit ekonomik, ministritë do të kujdesen për këto fusha, për krijimin e ambientit për investimet e jashtme, përkrahja për zhvillimin rural dhe bujqësinë, luftimin e ekonomisë joformale dhe forcimin e kapitalit njerëzor. Do të fillojmë me rrugën e kombit dhe me autostradën Prishtinë-Shkup. Po ashtu do të vazhdojmë me zgjerimin e magjistraleve, Prishtinë-Mitrovicë dhe Prishtinë-Pejë”, ka deklaruar ai.

Ndërkohë ai ka thënë se në fushën e qeverisjes së mirë Qeveria e Kosovës gjatë 2013 do të ketë objektiv mbështetjen e sistemit të drejtësisë.

Sipas tij, angazhimet e Qeverisë do të fokusohen në rritjen e efikasitetit në sistemin drejtësisë, luftimin e korrupsionit, reformat në administratën publike dhe plotësimi i kritereve të BE-së për liberalizimin e vizave.

Thaçi ka thënë se një prej prioriteteve që do të angazhohet Qeveria për zhvillimin e arsimit të lartë, ku përveç Universitetit të Prizrenit, do të vazhdojnë edhe hapja e Universitetit në Gjilan, Gjakovë, ndërsa në Mitrovicë është duke u bërë ndërtesa e Universitetit.

Ai ka thënë se ekzekutivi i vendit do të vazhdoj me regjistrimin e veteranëve, gjithashtu edhe në angazhimin për statusin e kategorive të luftës.

Në mbledhjen e kabinetit qeveritar është miratuar Projektligji për ndryshimin dhe plotësimin e Ligjit për Sigurinë e Përgjithshme të Produkteve.

Gjithashtu është miratuar edhe Programi i Statistikave Zyrtare për vitin 2013-2017.(express)