Thaçi: Do ta kemi ulësen në OKB

Kryeministri i Kosovës, Hashim Thaçi, e ka bërë të qartë se vendi ynnë nuk do të mbetet viktimë e së kaluarës dhe nuk do të merret më me armikun e së kaluarës. Thaçi, intervistën e tij për mediumin prestigjioz “Al Jazeera”, e fillon duke folur për të kaluarën dhe për idealin e UÇK-së.

Ai thotë se shqiptarët nuk i kanë urryer kurrë serbët, por kanë rezistuar ndaj prezencës së egër serbe në Kosovë.

“Si lider i Ushtrisë Çlirimtare të Kosovës, ne luftuam jo për shkak se kërkuam luftë, por për shkak se ka qenë e nevojshme që të sigurojmë lirinë dhe pavarësinë. Sidoqoftë, ne nuk e kemi urryer Serbinë. Në fakt, ishte një rezistencë ndaj prezencës së Serbisë në Kosovë”, theksoi kryeministri.

Thaçi e vlerësoi marrëveshjen me Serbinë si historike, teksa beson se shumë shpejt vendi ynnë do të integrohet në strukturat e institucioneve euroatlantike, ashtu sikurse edhe do ta fitojë ulësen në OKB.

“Të gjithë e dinë të kaluarën e hidhur të Kosovës. Gjenocidi i madh dhe luftërat për pavarësinë në vitin 1999. Ne kaluam nëpër një tranzicion demokratik dhe në vitin 2008, Kosova deklaroi pavarësinë e saj”.

“Sot, Kosova është një vend i pavarur dhe ka një synim të qartë: Integrimin në BE dhe në NATO… Vizioni ynnë është që Kosova në të ardhmen e afërt të ketë edhe ulësen e saj si shtet i pavarur në OKB”, deklaroi Thaçi për Al Jazeera.

Kryeministri i Kosovës shtoi se do të ketë probleme në implementimin e mëtutjeshëm të marrëveshjes, por i quajti iluzione teoritë për ndarjen e Kosovës, apo për një “Republika Srpska” në veri, pasi beson se marrëveshja është funksionale dhe garanton integritetin territorial të Kosovës. /Telegrafi/