Thaçi: Dialogu duket më keq se sa që është

Presidenti i vendit Hashim Thaçi ka thënë se dialogu në mes të Kosovës dhe Serbisë po shfaqet më keq se sa që është. Ai njëherit shprehu bindjen se të dyja palët do të arrijnë në pikën kudo të jetë e mundur të zhvillohen negociata në mënyrë normale.

Në një intervistë për të përditshmen austriake “Die Presse”, kreu i shtetit ka thënë gjithashtu se kohë pas kohe nga të dyja palët dëgjon deklarata të cilat janë të pamenduara mirë, transmeton Klan Kosova.

Ai ka shtuar se politika e përgjithshme si ajo e Prishtinës poashtu edhe e Beogradit, janë duke shkuar drejt normalizimit.

Sipas tij, ngjarjet e fundit mund të ndikojnë negativisht në normalizimin e marrëdhënieve, por se siç tha ai “procesi duhet të vazhdojë”.

“Arrestimi i shefit të policisë në Mitrovicë, Nehat Thaçi në Serbi nuk ishte i nevojshë, jemi të bindur se ai së shpejti do të lirohet dhe ne s`do ti përgjigjemi me të njëjtat mjete”

Ndërkaq i pyetur se pse 88.000 serbë nga Kosova akoma jetojnë në Serbi, Thaçi u përgjigj:“Kosova është atdheu i të gjithëve. Ne i mirëpresim përzemërsisht gjithë serbët që të kthehen dhe kjo mbrohet edhe me kushtetutën tonë.”