Thaçi: Deputetët të mos bëhen provincialë – s’ka lëshime në demarkacion

Presidenti i vendit, Hashim Thaçi edhe një herë ka përsëritur se, sipas tij, grupet e ndryshme politike po përdorin kauza të rreme për të kundërshtuar demarkacionin me malin e Zi vetëm për përfitime personale e logjikë provinciale.

Ai nëpërmjet facebook’ut ka siguruar prapë se shënjimi i vijës kufitare mes Kosovës dhe Malit të Zi është në rregull dhe nuk ka pasur asnjë lëshim që mund të çojë në humbje territori për vendin tonë.

Ja çfarë shkruan Presidenti Thaçi:

Sa më shumë që i afrohemi ditës kur Kuvendi i Republikës së Kosovës do të ratifikojë shënimin e vijës kufitare mes Kosovës dhe Malit të Zi, aq më tepër Kosova po dëshmon vendosmërinë për të ardhmen e saj euroatlantike. Faktet e reja dëshmojnë se procesi i shënimit të vijës kufitare nuk ka pasur asnjë lëshim dhe, si përfundim, Kosova nuk humb asnjë metër katror të territorit të saj. Këto fakte hedhin poshtë në tërësi kauzat e rreme të kundërshtarëve të këtij procesi të cilët në vazhdimësi e kanë kundërshtuar atë për interesa personale dhe përfitime politike.

Ky zhvillim i ri pozitiv ka bërë që të fuqizohet vullneti politik i pjesës dërrmuese të deputetëve të Kuvendit të Kosovës për ta votuar ratifikimin e kësaj marrëveshjeje. I gjithë opinioni publik dhe në veçanti deputetët e Kuvendit të Kosovës e kanë kuptuar në mënyrë të drejtë rëndësinë e këtij vendimi, i cili i hap Kosovës perspektivë të sigurt euroatlantike dhe fuqizon subjektivitetin e saj ndërkombëtar.

Edhe një herë ftoj gjithë spektrin politik dhe deputetët e Kuvendit të ngrihen mbi çdo interes dhe logjikë provinciale. Të veprojmë sa më të bashkuar për interesat e vendit. Këtë e presin qytetarët e Kosovës, këtë e presin miqtë tanë ndërkombëtarë.