Tetë kompani në garë për privatizimin e PTK-së
RajoniPress
19:01, 13 Gusht, 2012
Prishtinë – Komisioni Qeveritar i Privatizimit të PTK-së, njofton opinionin publik, se sot në ora 16.00 ka mbaruar afati i dorëzimit të aplikacioneve për para kualifikim të kompanive të interesuar për pjesëmarrje në tenderin për blerjen e 75% të aksioneve të ndërmarrjes Publike Posta dhe Telekomunikacioni i Kosovës Sh.A. Kompanitë të cilat kanë dorëzuar aplikacionet e tyre për parakualifikim janë:
Albright Capital Management LLC ( Shtetet e Bashkuara të Amerikës )
Avicenna Capital LLC në konsorcium me Twelve HORNBEAMS ( Mbretëria e Bashkuar, Poloni )
Columbia Capital në konsorcium me ACP Axos Capital Gmbh ( Shtetet e Bashkuara të Amerikës, Gjermani)
Elkos LLC ( Kosovë )
Geni Capital (Luxemburg )
M1 International Limited ( British Virgin Islands )
Monaco Telecom International SAM ( Monaco )
Turkcell ( Turqi )
Numri i lartë i kompanive pjesëmarrëse në procesin e para kualifikimit tregon se ekziston një interesim shumë i madh dhe një konkurrencë e lartë për blerjen e aksioneve të kësaj ndërmarrje të rëndësishme publike.
Ofertat e pranuara, do të vlerësohen nga një komision profesional i përbërë nga zyrtarët e të gjitha ministrive të përfaqësuara në KQP. Komisioni vlerësues në punën e vet do të ndihmohet edhe nga këshilltari i transaksionit.
Thirrja për para kualifikim është shpallur me datë 25 qershor 2012, ndërsa në këtë periudhë nga këshilltari i transaksionit janë dhënë të gjitha sqarimet e kërkuara nga kompanitë e interesuara për aplikim, për formën dhe përmbajtën e aplikacionit për para kualifikim.
Pas analizimit të aplikacioneve të kompanive në pajtueshmëri me thirrjen për para-kualifikim, opinioni publik do të njoftohet për kompanitë e para kualifikuara dhe të njëjtat do të ftohen për pjesëmarrje në tender.
KQP mbetet e përkushtuar për ta kryer me sukses dhe me transparencë të plotë procesin e privatizimit të 75% të aksioneve të PTK-së.
KQP gjatë kryerjes së këtij procesi do ti kushtoj rëndësi të posaçme edhe zhvillimit të mëtutjeshëm dhe progresiv të sektorit të telekomit dhe veçmas të kompanisë ku shteti do të jetë aksionar me 25% dhe mirëqenies së punëtorëve të telekomit që do të jenë pjesë e kompanisë me kapital të përzier privat dhe publik.
