Gjilan – DKA i siguron të gjithë nxënësit që i nënshtrohen testit të maturës se janë bërë të gjitha përgatitjet e duhura për një mbarëvajtje sa më të mirë të këtij testi dhe se në asnjë variant nuk do të cenohet e drejta e tyre dhe dija që ata tregojnë në këtë proces.
Në një deklaratë të drejtorit të Drejtorisë Komunale të Arsimit në Gjilan, të lëshuar enkas për testin e nesërm të maturës, Bujar Nevzati tha se nesër më 9 qershor 2012 siç dihet mbahet testi i maturës në tërë Kosovën. Drejtoria e Arsimit e Komunës së Gjilanit i ka bërë të gjithë përgatitjet e nevojshme për një organizim sa më të mirë të testit të maturës, pra kemi përgatitur 16 qendra të testimit që do të mbahen të gjitha në shkollat e qytetit.
Prandaj, ne si drejtori e Arsimit apelojmë te të gjithë nxënësit maturantë që të jenë me kohë para qendrave të testimit, pra të jenë në orën 9:00 në qendrën ku për ta do të mbahet testimi. Gjithashtu nga ata kërkohet të jenë të disiplinuar, t’i zbatojnë rregullat me të cilat ata janë njoftuar paraprakisht nga kujdestarët e tyre, por njëkohësisht të jenë vigjilent dhe të mos frikësohen sepse ne ju garantojmë se të drejtat e tyre nuk guxon t`i shkel askush. Ata duhet të sillen sikur të jetë kjo një ditë e zakonshme e mësimit.
Ai bëri të ditur se në testin e sivjet të maturës marrin pjesë gjithsejtë 2265 maturant, prej tyre 1800 janë maturant të rregullt, ndërsa pjesa tjetër, prej 465 janë maturant që i nënshtrohen sërish testit të maturës nga viti i kaluar.
Ata nxënës të cilët herën e parë nuk arrijnë ta kalojnë 50% të testit, nuk kanë të drejtë të hyjnë në testin e dytë, ndërsa nëse anulohet ndonjë qendër e testimit, për shkak të parregullsive, poashtu nuk ka kthim prapa pa kaluar një vit.
Përveç administratorëve, (një i tillë do të jetë për 15 nxënës), do të jetë edhe një komision mbikëqyrës, prej tre përfaqësuesve, një nga MASHT-i, një nga DKA-ja, dhe një nga drejtoria e shkollës, ndërsa një monitorues kryesor do të jetë nga Universiteti i Prishtinës.
Në fund drejtori i drejtorisë Komunale të Arsimit u dëshiron maturantëve suksese në testin e maturës dhe uron që Komuna e Gjilanit të dal më e suksesshme në këtë proces se viteve më parë. /rajonipress/
