Testi i arritshmërisë, Nagavci: Pyetjet u shpërndanë si shkak i keqmenaxhimit të procesit

Ministrja e Arsimit, Arbërie Nagavci, deklaroi të martën se shpërndarja në internet e pyetjeve gjatë procesit Të Testit të Maturës dhe të Arritshmërisë, ka ndodhur për shkak të mosmenaxhimit të mirë.

Në një konferencë për media, Nagavci u shpreh se për mbikëqyrjen e Testit të Maturës, i cili është mbajtur dy javë më parë, si ministri kanë shtuar personelin, ndërsa për Testi i Arritshmërisë tha se është në kompetencë të komunave.

“Sa i përket Testit të Arritshmërisë që po mbahet sot, ne po i presim rezultatet. Është e vërtetë që për shkak të menaxhimit jo të mirë mjaftueshëm ka ndodhur edhe rrjedhja e testeve. E sa i përket Testit të Maturës, kemi rritur numrin e administruesve, ndërsa Testi i Arritshmërisë është në kompetencë të komunave dhe ato i caktojnë administruesit”.

“Por, natyrisht ne si ministri e kemi nga një përfaqësues në secilën komunë, presim raportet dhe pastaj marrjen e masave”, tha ajo.

Nagavci shtoi se janë duke i adresuar masat e Ligjit e Testit të Maturës, për masat që duhet të merren në rast të shkeljeve. /Telegrafi/