Tërnava e Surdulli dakordohen për të bashkëpunuar

Gjilan – Tërnava ka thënë se Bashkësia Islame, nuk ndërton vetëm xhami në Kosovë, por ka ndihmuar në ndërtimin e mbi 40 shkollave në tërë territorin e Kosovës, çerdheve, renovime të objekteve shëndetësore, sigurimin e bursave për studentë në lami të ndryshme .

Kryetari i komunës së Kamenicës Shaip Surdulli, ka mirëpritur Myftiun Niam Tërnava me bashkëpunëtorë. Myftiu Tërnava, ka falënderuar Kryetarin Surdulli, për punën që ka bërë në komunën e Kamenicës me stafin e tij, si dhe për bashkëpunimin e mirë që ka me Këshillin e Bashkësisë Islame.

Ai në emër të Këshillit të Bashkësisë Islame të Kosovës dhe atij komunal, falënderoj Kryetarin, për ndarjen e parcelës për nevoja të Bashkësisë Islame të Kamenicës dhe përkrahjen e vazhdueshme që ka dhënë për këtë institucion fetarë.

Kryetari i komunës së Kamenicës Shaip Surdulli, ka thënë se ne jemi munduar që me drejtor të drejtorive komunale si dhe këshilltarët e Kuvendit, që t’i përkrahim kërkesat e bashkësisë islame.

Këtë vit komuna e Kamenicës, ka ndihmuar me një shumë simbolike dy xhamitë në fshatin Koretinë, kurse vitin e kaluar kemi ndihmuar xhaminë në fshatin Dajkoc, Desivojcë, ndërtimin e murit mbrojtës për xhaminë në Berivojcë dhe objektin e mejtepit në Hodonoc.

“ Si problem kyç në komunën e Kamenicës është mungesa e një objekti shkollor në fshatin Rogaqicë, ku objektin e tanishëm shkollor e shfrytëzojnë nxënësit e shkollës fillore dhe dy shkollave të mesme dhe mësimi zhvillohet në tri ndërrime dhe me orar të shkurtuar “ ka thënë Surdulli.

Ai, kërkoj nga Myftiu Tërnava, që t’i dalë në ndihmë në gjetjen e ndonjë donatori të mundshëm, pasi që nga Ministria nuk ka ndonjë premtim në realizimin e këtij objekti shkollorë.

Myftiu Naim Tërnava, premtoj se do të angazhohet në gjetjen e donatorëve, ku edhe nuk mungoj optimizmi i tij, prandaj kërkoj që komuna të përgatis planin dhe dokumentacionin përkatës për këtë objekt shkollor.

Ai tha se Bashkësia Islame, nuk ndërton vetëm xhami në Kosovë, por ka ndihmuar në ndërtimin e mbi 40 shkollave në tërë territorin e Kosovës, çerdheve, renovime të objekteve shëndetësore, sigurimin e bursave për studentë në lami të ndryshme etj./rajonipress/