Telefonitë fqinje i dëmtojnë kosovarët

“Mobilna Telefonija Serbije” vazhdon të ketë valë telefonike në pjesën më të madhe të Republikës së Kosovës, duke u shkaktuar dëme operatorëve legalë në Kosovë dhe buxhetit të Kosovës.

Edhe pse është arritur marrëveshja për telekomunikacion në mes të Kosovës dhe Serbisë, kjo e fundit ende nuk e ka ndalur interferimin e operatorëve të telefonisë mobile në territorin e Kosovës, shkruan Koha Ditore.

Por nuk është vetëm Serbia ajo që nuk e ka kryer obligimin që rrjedh prej marrëveshjes në mes të dy shteteve, pasi edhe operatorët e shteteve të tjera fqinje interferojnë në territorin e Kosovës.